Contract de mariage entre Maurice Rivest et Marie Cusson, 1671-01-07, Notaire: Severin Ameau
Notaire royal aux TroisRivieres soubzsigne au traicte de mariage qui au bon plaisir des contractants sera faict et solennize en face de Nostre Mere Saincte Eglise Catholicque Apostolicque et Romaine entre Maurice Rive natif de la parroisse de Coignac en la ville de la Rochelle fils de deffunct Jacques Rivee et de Marie Dieuray ses pere et mere d'une part, et Marie Cusson, natisve de la paroisse du Cap de la Magdeleine, fille de maistre Jean Cusson, nottaire royal audict Cap, et de Marie Foubert ses pere et mere d'autre part, furent presents en leurs personnes lesdicts contractants futurs espoux, leurs parents et bons amis presence desquels ledict Cusson et Marie Foubert ses pere ont promis de bailler en mariage ladicte Marie Cusson leur fille audict Rive laquelle Marie Cusson promet et a promis foy et loyaute de mariage de son bon gre et volonte audict Maurice Rive, lequel a promis et promet par ces presentes prendre en mariage pour sa femme et legitime espousse ladicte Marie Cusson le plustost que faire se pourra si Dieu et nostre mere la saincte eglize y consent et accorde en faveur en contemplation duquel futur mari et femme lesdicts Maurice Rive et Marie Cusson futurs espoux ont consenty et accorde vivre ensemblement uns et communs en biens incontinent apres ledict mariage accomply et consomme en laquelle communaute ils ont octroyes tous leurs biens generalement quelconques en particulier ladicte Marie Cusson future espouse ses droicts et ce qu'il pourra lui echoir par succession desquels ladicte Marie Cusson future espouse ledict Maurice Rive sera contente lequel a doue et doue sa future espouse douaire coustumier de la ville prevoste et vicompte de Paris est accorde entre les dictes parties que si le dict Maurice Rive vient a decedder sans enfants issus dudict futur mariage il a donne et donne a ladicte Cusson tous ses biens meubles et immeubles acquests et concquests acquis tant avant que constat ledict future mariage pour par elle jouir a perpetuite, et en prendre possession incontinent apres le deceds dudict donateur. Mais si ladicte Cussoon vient a decedder sans enfants issus dudict futur mariage le restant de ses biens retournera a ses heritiers et si Dieu leur donne des enfants ils ont consentty et accorde de part et d'autre s'arrester en toutes circonstances aux us et coustumes de Paris le tout ainsy accorde entre les dicts contractants et futurs espoux obligeant et donnant foy. Donne et faict et passe au Cap de la Magdelaine ce jourdhuy septiesme jour de janiver mil six cents soixante et onze, avant midy en presence de leurs parents et bons amis desquels ils ont este assistes a scavoir de la part dudict Maurice Rivee ont assiste Charles Gardeur escuyer sieur de Villiers et damoiselle Jeanne de Mattar sa femme Adrien Saillot dict La ? huissier audict Cap de la Magdelaine et de la part de ladicte Marie Cusson ont assiste ledict sieur Jean Cusson, son pere Marie Foubert sa mere, et Marie Riviere sa grandmere, Jean Cusson son frere, Michel Pelletier sieur de Laprade et seigneur de la coste de Sainct Michel et Jacqueline Chamboy sa femme, Jeanne Aunois, veufve de deffunct maistre Pier Lefebvre, Joseph Desportes, tous parents et bons amis.